Белгілі композитор, академик Ахмет Жұбанов: «Халық аспаптарының ішектерінде ғасырлар бойғы даналық тұнып тұр», — деген еді.

Қазақтың көптеген музыкалық аспаптары халық поэзиясында, тарихшылар мен этнографтардың жазбаларында кездеседі. Осы деректерді негізге ала отырып, музыкатанушы, қазақтың ұлттық музыка аспаптарын жинаушы әрі сол аспаптарда орындаушы, педагог, өнертану ғылымдарының кандидаты Болат Сарыбаев қазақ халық аспаптарының жіктемесін жасаған, оған сәйкес қазақ халқының музыкалық аспаптары мынадай топтарға бөлінеді (бұл жерде көріп тұрғандарыңыз сол кісінің жіктеуі бойынша қойылған аспаптардың түрлері):

• Шулы музыкалық аспаптар;
• Ұрмалы музыкалық аспаптар;
• Ішекті музыкалық аспаптар;
• Үрмелі музыкалық аспаптар;
• Тілшелі музыкалық аспаптар.

Музей қорындағы халық музыка аспаптары мұралары өзінің жіктелу тобына қарай жеке-жеке залдарға бөлініп қойылған. Аспаптар жайлы толығырақ – олардың жасалу техникалары, ойнау тәсілдері мен қолданылу мақсаттары туралы келесі залдарда толығырақ айтылатын болады.

Кіріспе залының келесі бөлімі – музыкалық археология. Бұл жерде археологиялық қазбалар нәтижесінде табылған көне музыкалық аспап түрлері мен аспап көшірмелері қойылған.

Музей экспозициясына қойылған музыкалық археологияға жататын олжалар халқымыздың тарихын, мәдениетін, тұрмысы мен салт-дәстүрін бейнелейтін айғақты деректер болып табылады. Қазақ даласынан табылған ортағасыр кезеңіне жататын мұралар туралы анықтамаларды академик Ә.Х. Марғұланның, зерттеуші-саяхатшы А.Г. Медоевтың, жазушы-ғалым А. Сейдімбектің, археолог ғалымдар К. Ақышев пен З. Самашевтың және т.б. еңбектерінен кездестіреміз.